პარიზში „პსჟ“-ს ახლადდანიშნული მწვრთნელის, ტომაშ ტუხელის წარდგენა გაიმართა. ღონისძიებას კლუბის პრეზიდენტი, ნასერ ალ ხელაიფი დაესწრო. ახალი მწვრთნელის წარდგენის შემდეგ, ტუხელმა პრესკონფერენცია გამართა და ჟურნალისტების კითხვებს უპასუხა.
„ამ კლუბს უმაღლესი მიზნები აქვს, ისევე როგორც მე. რა თქმა უნდა ჩვენ აქ გამარჯვებისთვის ვართ. თუმცა ჯერ დიდ გეგმებზე საუბარი ადრეა. ახლა ყველაზე მნიშვნელოვანი დეტალებზე საუბარია და ამ გზით ჩვენ მაღალ მიზნებს მივაღწევთ.“
„მსურს კლუბში ისეთი ატმოსფერო შევქმნა, რომ გუნდი იმავე დონეზე თამაშობდეს რა დონეზეც ჩემპიონთა ლიგის თამაშებია. ჩემი მიზანია კლუბმა ყველა თამაში ამ დონეზე ჩაატაროს, როგორც ლიგა 1-ის ისევე ჩემპიონთა ლიგის. ფეხბურთში ყველას ყველაფრის მიღწევა შეუძლია და წინასწარ ვერაფერს განსაზღვრავ. ასე რომ დღეს ნამდვილად ვერ გეტყვით ჩემი მწვრთნელობის პერიოდში გუნდს რა შედეგები ექნება, თუმცა თუ ამ კითხვას შემოდგომაზე დამისვამთ გეტყვით რისთვის ვიქნებით მზად.“
„ჩემი გამოცდილებით შემიძლია გითხრათ, რომ დიდებული ფეხბურთელები ყველაზე მეტს მუშაობენ, სწორედ ამიტომ არიან ისინი გამორჩეულები. მათთან მუშაობა ყველაზე ადვილია, რადგან ზუსტად იციან რა არის საჭირო იმისთვის რომ მაღალ დონეზე იასპარეზონ. „პსჟ“-მ უამრავი ტიტული მოიგო და საკმაოდ რთული იქნება მსოფლიო ჩემპიონატის შემდეგ წინასასეზონო პერიოდის სრულფასოვნად გავლა. თუმცა კლუბის ფეხბურთელებმა არაერთხელ დაამტკიცეს, რომ ისინი პროფესიონალები არიან და იციან თუ როგორ უნდა მოიქცნენ. სწორედ ამიტომ არ მაშინებენ გუნდში მყოფი ვარსკვლავები.“
„ნეიმარი ხელოვანია, ის განსაკუთრებული ფეხბურთელია. ბრაზილიელი მსოფლიოს ერთ-ერთი საუკეთესოა და მას განსაკუთრებული დამოკიდებულება სჭირდება, ეს ნორმალურიცაა. თუ ჩვენ შევძლებთ რომ თამაში მასზე ავაწყოთ და შევქმნით ტაქტიკას, რომელიც მის ნიჭს ბოლომდე გამოავლენს, ვფიქრობ ჩვენს მიზნებს მივაღწევთ. ნეიმარს უკვე შევხვდი და მისი გაცნობა სასიამოვნო იყო. მისი სახით საკმაოდ მეგობრულ და გახსნილ ადამიანს შევხვდი.“
პარიზულ გრანდთან ტომაშ ტუხელმა 2 წლიანი კონტრაქტი გააფორმა და პოსტზე, ესპანელი კოლეგა, უნაი ემერი ჩაანაცვლა. ტუხელი აქამდე გერმანიაში მუშაობდა, სადაც „მაინცისა“ და „დორტმუნდის“ მწვრთნელი იყო. მან „დორტმუნდი“ გასულ წელს, კონტრაქტის ვადის ამოწურვამდე ერთი წლით ადრე დატოვა, რისი მიზეზიც კლუბის ბორდთან დაძაბული ურთიერთობა იყო. მანამდე მან „ყვითლებს“ გერმანიის თასი მოაგებინა.
