ლიონელ მესი არგენტინის ნაკრებს ტოვებს

კოპა ამერიკის ფინალის შემდეგ, რომელიც არგენტინის ნაკრებმა ჩილეს ეროვნულ გუნდთან პენალტების სერიით წააგო, არგენტინელთა კაპიტანმა ნაკრების დატოვების გადაწყვეტილება მიიღო.

“ნაკრები ჩემთვის დასრულდა, გავაკეთე ყველაფერი რაც შემეძლო და ძალიან მტკივა, რომ ფინალი წავაგეთ”, – განაცხადა ნაკრების კაპიტანმა და საუკეთესო ბომბარდირმა.

არგენტინამ ზედიზედ მეორედ წააგო კოპა ამერიკის ტურნირის ფინალში ჩილესთან. შარშან, სანტიაგოში გამართულ ფინალშიც ანალოგიური ანგარიში დაფიქსირდა. უგოლო მატჩის შემდგომ პენალტების სერიაში, ისევე როგორც დღეს გამთენიისას, ჩილეს ეროვნულმა ნაკრებმა იმარჯვა და ზედიზედ მეორედ დაეუფლა საპატიო ტიტულს.

პენალტების სერიაში მესის დარტყმა არაზუსტი აღმოჩნდა, არტგენტინელთაგან ასევე უშედეგო იყო ლუკას ბილიას დარტყმაც.

ეს გათამაშება მნიშვნელოვანი აღმოჩნდა როგორც თავად მესისთვის, ასევე არგენტინის ნაკრებისთვისაც. ეროვნული გუნდის კაპიტანმა 5 გოლი გაიტანა, რითიც საუკეთოსო ბომბარდირი გახდა 55 შედეგიანი დარტყმით. 2002 წლიდან “ალბისელესტეს” საუკეთესო სნაიპერი გაბრიელ ბატისტუტა იყო 54 გოლით.

არგენტინელთათვის და მესისთვის ეს ზედიზედ მესამე წაგებული ფინალია. 2014-ში არგენტინა მსოფლიო ჩემპიონატის ფინალში გერმანიასთან, ანგარიშით 0:1 დამარცხდა, 2015 და 2016 წლებში კი ზუსტად ერთნაირი სცენარით – ჩილესთან პენალტების სერიაში დათმო კოპა ამერიკის გამარჯვებულის ტიტული. ამის გარდა, 2007 წელს, არგენტინა ასევე კოპა ამერიკის ფინალში ბრაზილიასთან დამარცდა.

ნაკრების მაისურით ლიონელ მესის მოგებული აქვს ახალგაზრდული მსოფლიო ჩემპიონატი და ზაფხულის ოლიმპიური თამაშები.

სხვადასხვა წყაროს მიხედვით, ნაკრებში კარიერის დასრულების შესახებ განცხადების გაკეთებას მასკერანო, იგუაინი, აგუერო, ლავესი, ბილია და დი მარიაც აპირებენ.