ნეიმარი – მუნდიალის საუკეთესო ფეხბურთელი თუ უბრალო მასხარა?

ბრაზილია-მექსიკის მატჩის გარშემო ბევრს ისაუბრებენ, მაგრამ არა ტაქტიკის შესახებ და არც მწვრთნელების გადაწყვეტილებებზე.

საფეხბურთო სამყაროს ყურადღება გადატანილია ერთ კონკრეტულ მოთამაშეზე, ალბათ ძნელი მისახვედრი არაა თუ ვინ იგულისხმება.

ნეიმარი არის თანამედროვე ფეხბურთის ყველაზე ოდიოზური პერსონა. გასულ ზაფხულს მან ააფეთქდა სატრანსფერო ფანჯარა, წელს – რუსეთის მუნდიალი. ორივე შემთხვევას ქომაგების მხრიდან დაახლოებით ერთი და იგივე რეაქცია მოჰყვა.

ზოგმა მოიწონა ბრაზილიელის გადაწყვეტილება “პსჟ”-ში გადასვლის თაობაზე, თუმცა ბევრმა ის შეიძულა. 2018 წლის მსოფლიო ჩემპიონატზე ანალოგიური რამ ხდება – ფანები მას აღმერთებენ და თვლიან, რომ სწორედ ნეიმარი მიიყვანს “სელესაოს” ოქროს მედლებამდე, ჰეითერების თვალში კი ბრაზილიელთა ათიანი არის ჯამბაზი.

ობიექტურად რომ ვიმსჯელოთ, ნეიმარი სულაც არ აზარალებს თავის ნაკრებს, პირიქით ის საოცრად პროდუქტიულია. დიახ, ბრაზილიელს ახასიათებს სიმულაცია, ტირილი და წუწუნი, თუმცა ამ ყველაფრის გარდა “სელესაოს” ლიდერი იტანს გოლებს, აკეთებს ასისტებს და ზოგადად სხვა კომპონენტებშიც ეხმარება გუნდს.

აღსანიშნავია, რომ ნეიმარი არ არის ერთადერთი ვარსკვლავი, რომელსაც უყვარს აფერისტობა და ბინძური თამაში. გაიხსენეთ რამოსი, სუარესი, კოსტა და კიდევ ბევრი სხვა. ცნობისთვის, არც რონალდუ ამბობდა უარს სიმულაციებზე თავისი კარიერის დასაწყისში.